၂၀၂၅၊ ဩဂုတ် ၃၀

        "ခွင့်သာခိုက်ကိုမှ မလိုက်ချင်လျှင်
        အမိုက်နင့်ပြင် ရှိသေးရှာလိမ့်လား။
        ခွင့်သာဆဲကိုမှ မခဲချင်လျှင်
        အလွဲနင့်ပြင် ရှိသေးရှာလိမ့်လား။
        ခွင့်သာတုန်းကိုမှ မရုန်းချင်လျှင်
        အရှုံးနင့်ပြင် ရှိသေးရှာလိမ့်လား။"

    လယ်တီဆရာတော်ဘုရားကြီး ရေးသားတော်မူခဲ့သော ခွင့်သာခိုက်မှမလိုက်ချင်လျှင် တေးထပ်ဖြစ်သည်။ အချိန်အခါ အခွင့်သင့်တုန်း အခွင့်အရေးရတုန်း ရယူထားသင့်ပြီး အမိအရဆုပ်ကိုင် မလုပ်ဆောင်နိုင်ပါက အရှုံးတို့နှင့် ရင်ဆိုင်ရနိုင်သည်ကို သတိပြုမိစေရန် သတိပေးထားခြင်းဖြစ်သည်။
    အချိန်အခါ အခွင့်ကောင်းတို့မည်သည် ကြုံတွေ့ရချိန်တွင် ရရှိသူတို့က မိမိရရဆုပ်ကိုင်၍ အကျိုးရှိရှိ အသုံးချတတ်ရန် လိုအပ်လှသည်။ ထိုသို့ အသုံးမချတတ်ပါက မည်သို့သော အခွင့်အလမ်းကောင်း ရရှိသည်ဖြစ်စေ အကျိုးမဲ့အချည်းအနှီးပင် ဖြစ်သည်။ နိုင်ငံရေး၊ လူမှုရေး၊ စီးပွားရေး နယ်ပယ်အသီးသီး ဖြတ်သန်းနေကြသူအားလုံး ကိုယ်စီထံသို့ အချိန်အခါ အခွင့်အလမ်းကောင်းများက တစ်ကြိမ်ထက် မနည်းရောက်ရှိလာတတ်ကြသည်။ အသုံးချတတ်သူများက အောင်မြင်တတ်ပြီး အသုံးမချတတ်သူများအဖို့ သဲထဲရေသွန်သာ ဖြစ်သည်။ မြန်မာနိုင်ငံအတွက် အချိန်အခါကောင်းတစ်ခုကရောက် ရှိလာတော့မည် ဖြစ်သည်။ ၂၀၂၅ခုနှစ် ဒီဇင်ဘာ ၂၈ ရက်တွင် ဒီမိုကရေစီလမ်းကြောင်းပေါ်သို့ ပြန်လည်ရောက်ရှိစေ မည့် အထွေထွေရွေးကောက်ပွဲကြီး စတင်ကျင်းပတော့မည်ဖြစ်သည်။ တိုင်းပြည်ဖွံ့ဖြိုးတိုးတက်ရေးအတွက် အချိန်အခါအခွင့်ကောင်းကို မရယူတတ်ကြသူတို့ကြောင့် ပြည်သူတစ်ရပ်လုံး ဒီမိုကရေစီကို ပြည့်ပြည့်၀၀ မခံစားလိုက်ရဘဲ မသမာသောရွေးကောက်ပွဲကြောင့် တိုင်းပြည်အခြေ အနေ ရုတ်တရက် ပြောင်းလဲခဲ့ရသည်။
    အရောင်စွဲ၊ အယူဝါဒစွဲ၊ ပုဂ္ဂိုလ်စွဲများဖြင့် မိသားစုဆွေမျိုး မိတ်ဆွေများအကြား သဘောထားကွဲလွဲမှုများဖြင့် အမုန်းပင်များကို စိုက်ပျိုးခဲ့ကြသည်။ ဒီမိုကရေစီကို လိုလားပါသည်ဟူသော ပါတီကြီးတစ်ရပ်က ဒီမိုကရေစီမဆန်စွာ ပြုမူခဲ့ကြပြီး အာဏာတည်မြဲရေးကို ကြိုးပမ်းရာမှစတင်ကာ တိုင်းပြည်ကို အကွက်ကျကျ နစ်မွန်းစေခဲ့သည်။ လက်နက်စွဲကိုင် အကြမ်းဖက်သတ်ဖြတ်မှုများ၊ မြို့ရွာ မတည်မငြိမ်ဖြစ်မှုများကို ဖန်တီးခဲ့ကြပြီးနောက် လေးနှစ်ကျော်ကာလအတွင်း တိုင်းပြည်သည် အကျိုးမဲ့ဆောင်ရွက်ချက်ဒဏ်များကို ခံစားခဲ့ကြရသည်။ တိုင်းပြည်နှင့် ပြည်သူ့မျက်နှာထက် အာဏာမျက်နှာကိုသာ ကြည့်ခဲ့ကြသူများက အာဏာရမ္မက်ဖြင့် တိုင်းပြည်ပျက်စီးစေရန် စစ်မီးပွားပေါင်းများစွာကို ဖန်တီးခဲ့ကြ သည်။ လူငယ်ပေါင်းများစွာကို ချနင်းကာ နိုင်ငံရေးအရောင်မှိန်အောင် ဆောင်ရွက်ခဲ့ကြသည်။ နိုင်ငံရေးပါး မဝသော ပြည်သူများကို ဉာဏ်အမှောင်တိုက်သွင်းကာ တော်လှန်ရေး အယုံသွင်းခဲ့ကြသည်။
    မျှော်လင့်ချက် အမှားများပေး၍ မျက်နှာပြောင်တိုက် တော်လှန်ရေးကို လုပ်ဆောင်ခဲ့ကြသည်။ ယခုဆိုလျှင် နှစ်ချီကြာမြင့်ခဲ့ပြီဖြစ်သဖြင့် ပြည်သူအများစု တော်လှန်ရေးအသိုင်းအဝိုင်း၏ လေလုံးထွား လိမ်ညာမှုများကို ရိပ်စားမိကြကုန်ပြီဖြစ်သည်။ နိုင်ငံရေးကို နိုင်ငံရေးလိုမလုပ်ဘဲ လူပြိန်းကြိုက်စကားများဖြင့် ဆောင်ရွက်ခဲ့ကြသော လူတစ်စု၏ နိဂုံးချုပ်ချိန်တန်ပြီ ဖြစ်သည်။
    ယခုဆိုလျှင် တပ်မတော်က တိုင်းပြည်တာဝန်ကို စတင်ယူခဲ့ပြီးနောက် ကတိပြုခဲ့သည့်အတိုင်း တရားမျှတသော ရွေးကောက်ပွဲကြီးက အကောင်အထည်ပေါ်လာခဲ့ပြီဖြစ်သည်။ မြန်မာပြည်သူပြည်သားများအားလုံးသွားရောက်ချင်သည့် ဒီမိုကရေစီပန်းတိုင်ကို သွားရောက်ရန်အတွက် တာလွှတ်ပေးသည့် ရွေးကောက်ပွဲကို ပြည်သူများ အာရုံစိုက်ရန်လိုသည်။
    အဘယ်ကြောင့်ဆိုသော် ဤလမ်းစဉ်ကသာ တာဝန်နှင့်ဝတ္တရားများကို ခွဲခြား၍ နိုင်ငံတော်ကို ဖွံ့ဖြိုးတိုးတက်စေမည့် လမ်းကြောင်းဖြစ်ခြင်းကြောင့် ဖြစ်သည်။ အစိုးရသည်လည်း အစိုးရတာဝန်၊ ပြည်သူသည်လည်း ပြည်သူ့တာဝန်၊ တပ်မတော်သည်လည်း တပ်မတော်တာဝန် အပြည့် အ၀ထမ်းဆောင် နိုင်မှသာလျှင် နိုင်ငံတော်သည် ဟန်ချက်ညီ ခရီးဆက်နိုင်မည်ဖြစ်သည်။ "ဒီမိုကရေစီစနစ်ဖြင့် မှန်မှန်ကန်ကန် ဆောင်ရွက်သွားမည်ဆိုပါက တပ်မတော်အနေဖြင့် ပူးပေါင်းဆောင်ရွက် သွားမည်ဖြစ်ကြောင်း၊ တပ်မတော်၏တာဝန်မှာ နိုင်ငံတော်ကာကွယ်ရေးပင် ဖြစ်ကြောင်း၊ ရွေးကောက်ပွဲပြုလုပ်ပြီးချိန်၌ အနိုင်ရရှိသည့်ပါတီမှ နိုင်ငံတော်တာဝန်ကို ထမ်းဆောင်ချိန်၌ တပ်မတော်သား လွှတ်တော်ကိုယ်စား လှယ်များ လွှတ်တော်အတွင်းပါဝင်၍ နိုင်ငံ့အရေး ဆောင်ရွက်ပေးခြင်း၊ တပ်မတော်အနေဖြင့်လည်း ဖွဲ့စည်းပုံအခြေခံဥပဒေက ပေးအပ်ထားသော အမျိုးသားနိုင်ငံရေးအခန်းကဏ္ဍ၌ ပါဝင်ဆောင်ရွက်ခြင်းနှင့် ဖွဲ့စည်းပုံ အခြေခံဥပဒေကာကွယ်ခြင်းတို့ကို ဆောင်ရွက်သွားမည်ဖြစ်ကြောင်း၊ တပ်မတော်သည် နိုင်ငံရေးအတွက် ပါဝင်ဆောင်ရွက်ခြင်းမဟုတ်ဘဲ နိုင်ငံ့အရေးဖြစ်သည့် နိုင်ငံတော် ကာကွယ်ရေးလုပ်ငန်းများတွင်သာ တာဝန်ထမ်းဆောင်သွားမည်ဖြစ်ကြောင်း နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ တပ်မတော်ကာကွယ်ရေးဦး စီးချုပ် ဗိုလ်ချုပ်မှူးကြီး မင်းအောင်လှိုင်က ပြောသည်။
    နိုင်ငံတော်အကြီးအကဲ၏ စကားကိုလေ့လာရာတွင် တပ်မတော်အနေဖြင့် တိုင်းပြည်ကို ဒီမိုကရေစီစနစ် မှန်မှန်ကန်ကန် လမ်းကြောင်းပေါ်သို့ ရောက်ရှိစေလိုသော စေတနာကို တွေ့မြင်ရသည်။ တပ်မတော်ကလည်း အမျိုးသားနိုင်ငံရေးအခန်းကဏ္ဍမှနေ၍ တိုင်းပြည်ကာကွယ်ရေးကို အာရုံစိုက်လုပ် ဆောင်မည့်သဘောကိုလည်း တွေ့မြင်ရသည်။ ထို့ကြောင့် ဒီမိုကရေစီလမ်းကြောင်းမှန်ပေါ်သို့ ရောက်ရှိစေရန် ရွေးကောက်ပွဲက စတင်လျှောက်လှမ်းရမည်သာ ဖြစ်သည်။ ဒီမိုကရေစီ မှန်မှန်ကန်ကန် လျှောက်လှမ်းနိုင်ရေးတာဝန်သည် နိုင်ငံရေးပါတီများနှင့် မဲဆန္ဒရှင်ပြည်သူများ ထမ်းရွက်ရမည့် တာဝန်ဖြစ်သည်။ တစ်ဖက်တွင်လည်း ရွေးကောက်ပွဲဆိုသည့် ကြေးစည်သံကို နားမခံနိုင်သော လူတစ်စုကလည်း ရှိနေ သည်။ ရွေးကောက်ပွဲသည် တိုင်းပြည် တည်ငြိမ်အေးချမ်းရေးအတွက် အရေးပါသည်ကို သိထားခြင်းကြောင့် တည်ငြိမ်အေးချမ်းမှုကို မလိုလားသော လက်နက်ကိုင်အချို့ကလည်း ပြည်သူ့မျက်နှာမကြည့်ဘဲ ရွေးကောက်ပွဲကန့်ကွက်မှုများ ပြုလုပ်လာသည်ကို တွေ့မြင်ရသည်။
    "လက်နက်ကိုင်အဖွဲ့အချို့ဘက်က လုပ်ပေးရမှာတော့ ရွေးကောက်ပွဲကို မနှောင့်ယှက်ဘူး၊ မကန့်ကွက်ဘူး ဆိုတာလောက် လုပ်ပေးရင်ကို အဆင်ပြေတယ်လို့ ပြောချင်ပါတယ်။ အခုလက်ရှိ ရွေးကောက်ပွဲသည် အကောင်းဆုံး အဖြေဆိုတာထက် ပို၍ကောင်းသော အခြေအနေကို ရောက်အောင် သွားနေတာ ဖြစ်တယ်။ အပြင်ကလူတွေ ကန့်ကွက်နေတယ်ဆိုတာ အထဲကလူတွေရဲ့ဆန္ဒကို နားမလည်ကြတာပါ။ အထဲမှာက အပြောင်းအလဲတစ်ခုကို လိုအပ်တယ်။ နိုင်ငံတစ်နိုင်ငံဟာ နိုင်ငံတကာနဲ့ တစ်သားတည်းဖြစ်နေမှာပဲ နေရထိုင်ရ အဆင်ပြေတာလေ။ အဲ့ဒီလိုမဟုတ်ဘဲ ဟိုပိတ်ဆို့ ဒီပိတ်ဆို့နဲ့ ကျွန်တော် အမြဲတမ်းပြောနေသလိုပဲ သိုင်းဘယ်လောက်တတ်တတ် လက်တွေခြေတွေ ကြိုးတုပ်ခံထားရရင် တိုက်ခိုက်ရခက်တာပေါ့လေ။ ဒါကြောင့် လွတ်လွတ်လပ်လပ် တိုက်ခိုက်လို့ရအောင် ဒီအခင်းအကျင်းက လိုအပ်တာပေါ့လေ။ NUG တို့ လူတစ်စုကတော့ ပြောမှာပေါ့ဗျာ။ ရွေးကောက်ပွဲပြီးသွားရင် အစိုးရသစ်တစ်ရပ် ပေါ်လာရင် သူတို့ရဲ့အနေအထား ပြောတာဆိုတာတွေက ဘာအဓိပ္ပာယ်မှ မရှိတော့ဘူးလေ။ နိုင်ငံတကာကလည်း အစိုးရသစ်ပေါ်လာရင် အရင်လို ပြန်ဖြစ်သွားကြမှာပါပဲ။ ကျွန်တော်တို့တွေ ကလည်း မတိမ်းမစောင်းလေး ဆက်သွားကြရင်ဖြင့် မျှော်လင့်ထားသလိုတွေ ဖြစ်လာမှာ ပါ။ တိုင်းပြည်ရဲ့ အရွေ့တစ်ခုကို ရောက်သွားပါလိမ့်မယ်"ဟု အမျိုးသားဒီမိုကရေစီအင်အားစုပါတီ (NDF) ၏ ဒုတိယဥက္ကဋ္ဌ ဦးထက်အောင်ကျော်က ပြောသည်။
    ယခုကျင်းပပေးမည့် ရွေးကောက်ပွဲအောင်မြင်ရေးအတွက် နိုင်ငံရေးပါတီများက တူညီသောဆန္ဒရှိနေကြပြီး ပြည်သူများကလည်း ရွေးကောက်ပွဲမှ ပြည်သူရွေးချယ်သော အစိုးရတစ်ရပ်ကို ပခုံးပြောင်းတာ ဝန်ပေးအပ်လိုကြကြောင်း တွေ့ရသည်။ ရွေးကောက်ပွဲနှင့်ပတ်သက်၍ ပြည်သူတစ်ဦးဖြစ်သူ ဦးဇော်ဇော်အောင်ကလည်း "ရွေးကောက်ပွဲကို မထောက်ခံဘူးဆိုတဲ့ အတွေးမျိုးကတော့ တည်ငြိမ်အေးချမ်းတဲ့ ဒေသက ပြည်သူတွေမှာ အဲဒီအတွေးမျိုး မရှိဘူးဗျ။ အခု ကန့်ကွက်တယ်ဆိုတာကလည်း လက်နက်ကိုင်ပြီး အရသာတွေ့သွားတဲ့လူတစ်စုရဲ့ ထုတ်နေတဲ့ အသံတွေလောက်ပဲလို့ ကျွန်တော်ကတော့ ယူဆပါတယ်။ ပြည်တွင်းမှာပဲ အေးချမ်းစွာနေထိုင် လှုပ်ရှားနေတဲ့သူ တော်တော်များများ နိုင်ငံရေး သမားကြီးတွေအစ ရွေးကောက်ပွဲလမ်းကြောင်းသာလျှင် နိုင်ငံရေးအပြောင်းအလဲကို တည်ဆောက်နိုင်မယ်လို့ အကုန်လုံးက ယုံကြည်ထားကြတာပါ။
        ကျွန်တော်တို့ သာမန်ပြည်သူတွေကလည်း ရွေးကောက်ပွဲ လမ်းကြောင်းသာလျှင် ၂၀၁၀ တုန်းကလိုပေါ့၊ ပြည်သူတွေတိုးတက်ဖို့ ဖွင့်ပေးနိုင်မယ့် လမ်းကြောင်းလို့ပဲ မြင်ပါတယ်။ ဒါကြီးကို မလိုလားဘူး ဆိုတာကတော့ လက်နက်ကိုင်လမ်းကြောင်းကနေ ကြီးပွားချမ်းသာနေတဲ့ လူတစ်စုက ပြည်ဖျက်မီဒီယာ တွေ အားကိုးပြီး ထုတ်နေတဲ့ အသံလောက်ပဲ ရှိပါတယ်။ ရာခိုင်နှုန်းအရတွက်ရင် သိပ်ပြီး ဂရုစိုက်စရာ ကောင်းလောက်အောင်ရှိတဲ့ အသံမဟုတ်ဘူးလို့ ကျွန်တော်ကတော့ မြင်ပါတယ်"ဟု သုံးသပ်ပြောဆို သည်။
    အပြောင်းအလဲတစ်ရပ်သည် ကောင်းမွန်သော အရွေ့တစ်ခုကို စွမ်းဆောင်နိုင်သည်ဆိုပါက ပြည်သူလူထုတစ်ရပ်လုံးက ထောက်ခံကြိုဆိုရမည်သာဖြစ်သည်။ လူတစ်စု၏ အသံကို နားယောင်ကာ မိမိတို့ ၏ အခွင့်အရေးကို အသုံးမချပါက မိမိတို့သာ နစ်နာဆုံးရှုံးမည်သာဖြစ်သည်။ "အရွေ့တစ်ခုကို သွားတဲ့နေရာမှာ လိုက်ရွေ့ရမှာပဲလေ။ မသွားရင်တော့ ကိုယ်ပဲကျန်ခဲ့မှာလေ။ နိုင်ငံရေးဆိုတာ ကိုယ်မပါရင် ကိုယ်ပဲကျန်ခဲ့မှာ။ဘယ်သူကမှ စောင့်ပြီးခေါ်မှာမဟုတ်ဘူး။ အဲဒါကို သိဖို့လိုတယ်။ ကျွန်မတို့ကတော့ အရွေ့တစ်ခုကိုရောက်ဖို့အတွက် ကိုယ်တိုင်ကလည်း အရွေ့တစ်ခုကို လှမ်းရမှာပေါ့။ အရွေ့တစ်ခုကိုမလှမ်းဘဲ ကိုယ်လိုချင်တာပဲ အတင်းတောင်းပြီးတော့ ပေကပ်ပြီးရပ်နေရင် ကိုယ်ပဲကျန်ခဲ့မှာလေ။ ဒီရွေး ကောက်ပွဲကတော့ အတိုင်းအတာတစ်ခုအထိကတော့ ပြောင်းလဲသွားမှာပဲ။ လူတွေရဲ့လူမှု ဒုက္ခခံစားနေရတာတွေကို ပြောပေးနိုင်သော ကိုယ်စားလှယ်တွေ ရှိလာမှာပေါ့လေ"ဟု NLD ပါတီဗဟို ကော် မတီဝင်ဟောင်း ဒေါ်စန္ဒာမင်းက ပြောသည်။
    ရွေးကောက်ပွဲဟူသည် ပြည်သူလူထု၏ နိုင်ငံရေးရေချိန်ကို တိုင်းတာသည့်ပွဲပင်ဖြစ်သည်။ ပြည်သူလူထုက မိမိတို့အပေါ် အကျိုးပြုနိုင်မည့် ကိုယ်စားလှယ်လောင်းများကို ရွေးချယ်၍ ကိုယ်စားပြုစေရမည်ဖြစ်သည်။ ပြည်သူတစ်ဦးချင်းစီ၏ ဆန္ဒမဲများကလည်း အရေးပါလှသော ရွေးကောက်ပွဲအဖြေကို ရရှိစေမည်ဖြစ်သည်။ လေးနှစ်ကျော်ကြာကာလအတွင်း ပြည်သူများကို အတိဒုက္ခပေါင်းစုံ ရောက်ရှိစေရန် ဖန်တီးလုပ်ဆောင် ကိုယ်ကျိုးရှာခဲ့ကြသူများ၏ နိုင်ငံရေးအဆင့်အတန်းကို ပြည်သူတို့ မျက်ဝါးထင်ထင် မြင်တွေ့ခဲ့ရပြီဖြစ်သည်။ ဒီမိုကရေစီဟု ဟစ်ေကြွေးကာ တိုင်းပြည်ကို အမှောင်ဖုံးစေရန် ဆောင်ရွက်ခဲ့ကြသူတို့၏ တိုင်းပြည်အပေါ် ထားရှိသည့် စေတနာကိုလည်း ခံစားခဲ့ကြပြီ ဖြစ်သည်။ ထို့ကြောင့် ထိုသူတို့က ပြည်သူများ ဒီမိုကရေစီလမ်းကြောင်း မှန်ပေါ် ပြန်ရောက်သွားမည့်အရေး တွေးပူကာ ရွေးကောက်ပွဲကို မှေးမှိန်စေရန် ပြုမူနေကြခြင်းသာဖြစ်သည်။ "သိက္ခာရှိသည့် ရွေးကောက်ပွဲ၊ သိက္ခာရှိသည့် လွှတ်တော်ဖြစ်စေရေး ဝိုင်းဝန်းဆောင်ရွက်ရမည်ဖြစ်ကြောင်း၊ ထို့ကြောင့် ဆန္ဒမဲပေးပိုင်ခွင့် ရှိသူများအား လုံးဆန္ဒမဲများ ပေးနိုင်ရေး နိုင်ငံတော်မှ ဆောင်ရွက်ပေးသွားမည်ဖြစ်ကြောင်း" နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က မကွေးတိုင်းဒေသကြီး ခရီးစဉ်အတွင်း ပြည်သူများနှင့် တွေ့ဆုံရာတွင် ပြောကြားခဲ့သည်။ ထို့ကြောင့် ပြည်သူများသည်သာ ရွေးကောက်ပွဲအတွက် အခရာကျသော မဲဆန္ဒရှင်များဖြစ်ပြီး နိုင်ငံရေးအတွေးအမြင်မှန်များဖြင့် ချဉ်း ကပ်ရမည်သာ ဖြစ်သည်။
    ပြည်သူလူထု၏ နိုင်ငံရေးဆိုင်ရာ အသိအမြင်များ ပြည့်ဝစေရန်အတွက် ပြည်သူလူထုကိုယ်တိုင်က ကြိုးစားဖြည့်ဆည်းကြရန်လည်း မဖြစ်မနေလိုအပ်သည်။ ပြည်သူလူထုအနေဖြင့် နိုင်ငံရေးအသိအမြင် မှန်ကန်ရေး၊ ကြွယ်ဝပြည့်စုံရေး ဖြည့်ဆည်းဆောင်ရွက်ခြင်းသည် မိမိတို့ အကျိုးစီးပွားတစ်ခုတည်းအတွက် ဆောင်ရွက်ရာ ရောက်မည်သာမကဘဲ နိုင်ငံတော်၏ အကျိုးစီးပွား ဖြစ်ထွန်းရေး၊  နိုင်ငံတော်ဖွံ့ဖြိုး တိုးတက်ရေး၊ ကောင်းမွန်သော နိုင်ငံရေးစနစ် ပေါ်ပေါက်ရေးအတွက် လုပ်ကိုင်ဆောင်ရွက်ရာလည်း ရောက်မည် ဖြစ်သည်။
    တိုင်းပြည်၏ အချိန်အခါ အခွင့်ကောင်းရောက်ရှိရန် အချိန်ကာလအားဖြင့် ရေတွက်ရာ ရက်ပေါင်းတစ်ရာကျော်သာ လိုတော့သည်။ ဒီမိုကရေစီ အသီးအပွင့်များ ပြန်လည်ခံစားရရေးအတွက် ပြည်သူ လူထုတစ်ရပ်လုံး ညီညွတ်မှုအားဖြင့် တည်ဆောက်ရတော့ မည်ဖြစ်သည်။ ချန်ထားရစ်ရမည့်သူများကို ပြတ်ပြတ် သားသား ချန်ထားရတော့မည့် ကာလဖြစ်သည်။ တိုင်းပြည်အကျိုးအတွက် မြူမှုန်တစ်မှုန်စာမျှ အကျိုးမပြုဘဲ တိုင်းပြည်နစ်မွန်းစေလို သူတို့ကို ပြည်သူလူထုက အလိုမရှိကြောင်း ညီညီညွတ်ညွတ် ပြသရတော့မည်ဖြစ်သည်။ ထိုအခွင့်အရေးကို မိမိရရ ဆုပ်ကိုင်နိုင်မှသာ တိုင်းပြည်၏ ဒီမိုကရေစီ အနာဂတ်ခရီးလမ်း ခိုင်မာအားကောင်း လာမည်သာဖြစ်သည်။ "ဒီမိုကရေစီသည် ငါတို့ပါတီမှသာ ပေးနိုင်သည်"၊ "လူသတ်အကြမ်းဖက်ခြင်းက ဒီမိုကရေစီအရေးတွင် တိုက်ပွဲဝင်ခြင်းဖြစ်သည်"ဟူသော ငါစွဲအတ္တသမားတို့နှင့် ပြည်သူဆန္ဒမှာ ပြဒါးတစ်လမ်း သံတစ်လမ်းဖြစ်ကြောင်း လူထုအားဖြင့် ပြသရတော့မည် ဖြစ်သည်။
ထူးမြတ်
(TREND News ဂျာနယ်အတွဲ(၄)၊ အမှတ်(၃၂) တွင်ပါရှိသော ဆောင်းပါးအား တစ်ဆင့်ပြန်လည်မျှဝေခြင်းဖြစ်ပါသည်။ )