၂၀၂၅ ၊ ဩဂုတ် ၃၀

ဒါ့ကြောင့် ဒီလိုကိုး
    မင်္ဂလာပါ မိတ်ဟောင်းဆွေသဟာများခင်ဗျား။ မိတ်ဆွေများအတွက် ဘာမျှမထူးဆန်းနိုင်သော်လည်း ကျွန်တော့်အတွက် ထူးဆန်းသည်ဟု ခံစားရသည့် အကြောင်းအရာကို ဝေမျှလိုစိတ် ဖြစ်နေသည်။ သည်ရက်ပိုင်းအတွင်း မိတ်ဆွေများ စစ်ရေး၊ နိုင်ငံရေးသတင်းများကို သတိများထားမိပါစ။ ကျွန်တော် သတိထားမိသည့် အကြောင်းက တော်လှန်ရေးသမားဆိုသူတို့ စကားလုံး မဲ့နေကြသည်ဟု ခံစားနေရသည်။ သူတို့အတွက် ပြောစရာ မယ်မယ်ရရ မရှိရှာဘဲ မည်သူ့ကို ရန်လိုရမလဲဟု အကြောင်းရှာ ပြဿနာရှာနေသည်ကိုသာ တွေ့နေရသည်။ အဘယ့်ကြောင့် ထိုကဲ့သို့ ဖြစ်သွားရသနည်းဟု မိတ်ဆွေထင်မြင်မိပါ သလဲ။ မိတ်ဆွေတို့ ထင်မြင်ယူဆချက်နှင့် ကျွန်တော့်တစ်ဦးတည်း ကိုယ်ပိုင်အမြင် ထင်မြင်ယူဆချက် တူညီချင်မှ တူညီပါလိမ့်မည်။ ကျွန်တော့်၏ ထင်မြင်ချက်ကို ပြောရလျှင် တော်လှန်ရေးသမား ဆိုသူတို့ စကားလုံးမဲ့သွားရသည့် အကြောင်းအရာက စစ်ရေး၊ နိုင်ငံရေးနှင့် လူမှုပတ်ဝန်းကျင်တွင် အဖတ်ဆယ်မရအောင် အရှုံးကြီး ရှုံးသွားသည့်အတွက်ဟု ဧကံတထစ်ချ ပြောလိုပါသည်။ "မောင်ရွှေထီးရာ မင်းကဘာဖြစ်လို့ တထစ်ချပြောနိုင်ရလဲ"ဟု မေးလာလျှင် ကျွန်တော်ရွှေထီးမှာ တိကျခိုင်မာသည့် အချက် အလက်နှင့် ပြောနိုင်ပါသည်ဟု ဆိုချင်ပါသည်။
    သူတို့စကားကို တိုက်ရိုက်ပြောပါရစေ။ "အမရပူရက ဒလန်အများဆုံးမြို့ပါ။ ဘုရားသွားကျောင်းတက်ပဲ လုပ်နေကြတာ၊ တော်လှန်ရေးကို စိတ်မဝင်စားတော့ဘူး၊ တော်လှန်ရေးကို သွေးအေးသွားတဲ့သူ တွေမြင်ရလေ ဒေါသထွက်လေပဲ"ဟု ဒေါသသံနှင့် ဆိုလေသည်။ ထိုအကြောင်းအရာကို သိသွားသူက "မင်းက အမရပူရ လောက်လေးပဲ မြင်တတ်တာကိုး။ မျက်လုံးကျယ်ကျယ် ဖွင့်တိုင်းအမြင်ကျယ်ချင်မှ ကျယ်တာ ငါ့ကောင်ရေ"ဟု အကျယ်အကျယ် မငြိမ်းဖွယ် ရှင်းမပြလိုသည့်သဘောနှင့် အပိတ်သဘော ပြောလေသည်။ ထိုသူနှစ်ဦး ပြောသည့် စကားများကိုကြည့်ပြီး စဉ်းစားခန်းဝင်မိ၏။ စဉ်းစားရင်း တွေးရင်း မေးခွန်းများ ပေါ်လာရ၏။ "မင်းတို့ဟာက တစ်ချိန်လုံးတော်လှန်နေရတော့မှာလား"၊ "ကိုယ့်ရဲ့ မိသားစု စားဝတ်နေရေး အလုပ် မလုပ်ရတော့ဘူးလား"၊ "ပညာရေး၊ ကျန်းမာရေးအတွက် မင်းတို့ တော်လှန်နေတဲ့ သူတွေက ဘယ်လောက် စေတနာပါပါ လုပ်ပေးနေလဲ"ဟု စသည်ဖြင့် မေးခွန်းပေါင်းများစွာ ပေါ်လာရသည်။
    ထိုမေးခွန်းပေါင်းများစွာနှင့်အတူ ရန်များကုန်စင်သည့် ရန်ကုန်ကိုကြည့်ပြီး သဘောပေါက်ရ၏။ ရန်ကုန်သူ ရန်ကုန်သားများက စိတ်လက်ပေါ့ပါးစွာဖြင့် သွားလာလှုပ်ရှားနေသည့် အသွင်သဏ္ဌာန်က အထင်းသားဖြစ်နေသည်။ ဘုရားတွင်လည်း ဝတ်ကောင်းစားလှများနှင့် ကုသိုလ်ယူနေသူ အများအပြား တွေ့ရ၏။ စားသောက်ဆိုင်များတွင်လည်း အလှူပေးနေသည့်အလား စည်ကားလှ၏။ သင်တန်းများ၊ ကျောင်းများတွင်လည်း လူငယ်လူရွယ်များက အနာဂတ်အတွက် တက်ကြွစွာ သင်ယူနေကြ၏။ သည်မြင်ကွင်းမျိုးကို မြင်တွေ့ရသည်မှာ ဘယ်မှာစိတ်မသက်မသာ ဖြစ်စရာ ရှိပါမည်နည်း။ ထိုအတွေးက ကျွန်တော့်အမြင်သက်သက်သာဖြစ်ပြီး စိတ်ချမ်းသာ၊ ကိုယ်ကျန်းမာဖြင့် ပစ္စုပ္ပန်တည့်တည့်ကို အကောင်း ဆုံးလုပ်ပြီး အနာဂတ် တည်ဆောက်နေသူများကို တော်လှန်ရေးဆိုသူများက မျက်မုန်းကျိုးကြ၏။ တော်တော် အကုသိုလ်ကြီးသည့်သူများပါလားဟု သနားစိတ်ပင် ဝင်မိသွားသည်။ ကိုယ့်ဘဝကိုယ် တည်ဆောက် ခြင်းသည်ပင် အဖြစ်တစ်ခုအဖြစ် ရှုမြင်နေသလို ဘဝကို စွန့်လွှတ်သင့်ပါပြီဟု စေတနာရှေ့ ထား၍ ဆိုချင်ပါသည်။

ပိုနေမြဲ ကျားနေမြဲ
    သမိုင်း တစ်ပတ်လည်တတ်သည်ဆိုသည့် စကားကို သူငယ်ချင်းဖြစ်သူ၏ စကားနှင့် သေသေချာချာ လက်ခံမိပါသည်။ သူငယ်ချင်းဖြစ်သူက ရှေးဟောင်း နှောင်းဖြစ်များကိုပြောရင်း "မင်း ပိုနေမြဲ ကျားနေမြဲပုံပြင် သင်ခဲ့ရသေးလား"ဟု မေးလေသည်။ သည်အသက် သည်အရွယ်ရောက်မှ ပုံပြင်အ ကြောင်း ပြောသဖြင့် စိတ်ထဲတွင် ထူးဆန်းမိသွားသည်။ သို့သော်လည်း အမေးရှိလျှင် အဖြေရှိရမည် မဟုတ်လား။ သူငယ်ချင်းဖြစ်သူက ကျွန်တော့်ထက် နှစ်တန်းကြီးသဖြင့် သူတို့ ၁၀ တန်း တက္ကသိုလ်ဝင် တန်းအောင်ပြီးချိန် ပညာရေးစနစ်သစ် ပြောင်းသွားသောကြောင့် ကျွန်တော်က ထိုပုံပြင်ကို မသင်ခဲ့ရဟု ပြန်ပြောဖြစ်၏။ သို့သော် ထိုပုံပြင်ကို ကောင်းကောင်း ဖတ်ဖူးပါသည်ဟု ဆိုဖြစ်၏။ ဘာအတွက် ကြောင့် အဲဒီပုံပြင်အကြောင်း ပြောရလဲဟု သူ့ကိုပြန်၍ မေးခွန်းထုတ်ချိန် သူပြောပြသည်က စိတ်ဝင်စားစရာ ကောင်းလှ၏။ ဒေါက်တာသန်းထွန်းက "သမိုင်းဆိုသည်မှာ မအအောင် သင်သည်"ဟု မှတ်ချက်ပြုသကဲ့ သို့ ပုံပြင်သည်လည်း သင်ခန်းစာယူစရာများအတွက် လူကြီးသူမများ၏ လက်ဆင့်ကမ်းအမွေ ဖြစ်သည်ဟု ဆိုလေသည်။ ပိုနေမြဲ ကျားနေမြဲ ပုံပြင်နှင့် လွန်ခဲ့သည့် ဝေးကွာလွန်းသော သမိုင်းကြောင်းကို မပြောဘဲ ကျွန်တော်တို့ ကောင်းကောင်း သိမီခဲ့သော ခေတ်အကြောင်းကို ပြော ပြလေသည်။ ၉၀ ရွေးကောက်ပွဲတွင် ဖွဲ့စည်းပုံအခြေခံ ဥပဒေ မရေးဆွဲရသေးဘဲ အနိုင်ရပါတီက ဦးဆောင်ပြီး ခြေ/ဥ ရေးဆွဲမည်။
    ရွေးကောက်ပွဲကို ဦးစီးဦးဆောင် ကျင်းပပေးသည့် တပ်မတော်က ရွေးကောက်ပွဲ ရည်ရွယ်ချက်သည် အခြေခံဥပဒေ ရေးဆွဲနိုင်ရန် ကိုယ်စားလှယ်ရွေး ချယ်သည့်သဘောဖြစ်သည်။ ထိုအကြောင်းအရာကိုလည်း ရွေးကောက်ပွဲ မတိုင်မီက ရှင်းရှင်းလင်းလင်း တိတိကျကျ ပြဋ္ဌာန်းထားပါသည်။ အခြေခံဥပဒေ ရေးဆွဲပြီး မှ အာဏာကို လွှဲပြောင်းပေးမည်ဖြစ်ပြီး အခြေခံဥပဒေမရှိဘဲ ယာယီအခြေခံဥပဒေဖြင့် အာဏာ လွှဲမပေးနိုင်ကြောင်းလည်း ထုတ်ပြန်ထားသည်။ တိုတိုပြောရလျှင် ထိုအချိန်က NLD ထိပ်ပိုင်းခေါင်းဆောင်များနှင့် လွှတ်တော်ကိုယ်စားလှယ်များသည် တိုင်းပြည်အနာဂတ်ထက် သူတို့၏ ခေါင်းဆောင်အလိုကျ လိုက်ပြီး ပဋိပက္ခဖြစ်ကာ နိုင်ငံရေးလောဘ ရေချိန်မြင့်နေပြီးနောက် တဖြည်းဖြည်း NLD ကဏ္ဍ တစ်ခန်းရပ်သွားခဲ့ရ၏။ သူငယ်ချင်းဖြစ်သူက ထိုအကြောင်းအရာမှစပြီး NLD ခေါင်းဆောင်များကို ထိန်းသိမ်းခဲ့ရသည့်အကြောင်း NLD ဘက်မှလည်း တိုင်း ပြည်ဖွံ့ဖြိုးတိုးတက်မည့်ကိစ္စ မှန်သမျှ Block လုပ်ရန် အစွမ်းကုန် ကြိုးစားကြ၏။ ဘယ်သူထိခိုက်လဲဟု NLD ပါတီဝင်များနှင့် မျက်နှာချင်းဆိုင်မေးလျှင် တိတိကျကျ မဖြေလိုကြသည်ကို သတိထားမိသူများ သတိထားမိပါလိမ့်မည်။ ပုံပြင်အကြောင်းကို ဆက်ရလျှင် လှောင်ချိုင့်ထဲက ကျားကို သနားပြီး လွှတ်ပေးလိုက်၏။ ကျားသည်လည်း လှောင်ချိုင့်ထဲတွင် အစာရေစာ ပြတ်လပ်လာ၍ လွှတ်ပေးသူကို စားလိုကြောင်း ယုန်ပညာရှိ ခုံရုံးတွင် ရှင်းကြရ၏။ ယုန်ပညာ ရှိက သူသည်လက်တွေ့မှ ယုံကြည်သူဖြစ်ကြောင်း မောင်ပိုနှင့် ကျားကို မောင်ပိုမကယ်ခင်က အနေအ ထားအတိုင်းကြည့်၍ ဆုံးဖြတ်မည်ဟု ပြောလေတော့သည်။ လှောင်အိမ်ထဲက လူသည် လှောင်အိမ်ထဲမှာ နေရပြီး စေတနာနှင့်ကယ်သူလည်း အန္တရာယ်အပေါင်းက ကင်းလွတ်သည့် ပုံပြင်မဟုတ်လား။ သို့မို့ ကြောင့် သမိုင်းတစ်ပတ်လည်လာသောအခါ ထိုပုံပြင်အတိုင်း ဖြစ်ခဲ့ရကြောင်း သူငယ်ချင်းဖြစ်သူက စိတ်ရှည်လက်ရှည် ရှင်းပြလေသည်။ အခြေခံဥပဒေကို အောင်မြင်စွာ ရေးဆွဲနိုင်ခဲ့သည်။ အခြေခံဥပဒေ၏ ပေးထားချက်အတိုင်း နိုင်ငံတော်ကို အရွေ့တစ်ခုရောက်အောင် ဆောင်ရွက်ခဲ့သည်။ သို့သော် မောင်ပို ကဲ့သို့ စေတနာမရှိသော ကန့်လန့်တိုက်လိုသော သူများကြောင့် နစ်နာရသော တိုင်းပြည်ကို အမုန်းခံ အနစ်နာခံကာ ခေတ်ကောင်းတစ်ခုကို ဆောင်ရွက်နေကြောင်း ရေလည်ပတ်စေ့ ရှင်းပြမှ "သြော်...ပိုနေမြဲ ကျားနေမြဲကို သဘောပေါက်ပြီ"ဟု ဆိုလိုက်ရလေသည်။

ရွေးကောက်ပွဲ ဖျက်မည်ဆိုသူများအတွက်
    ဘုံပျောက်မှာ အကုန်ကြောက်နေသူများက တော်လှန်ရေးဟုဆိုကာ လူပြိန်းကြိုက်စကား ဆိုနေကြသူများ ဖြစ်နေလေသည်။ ဒီမိုကရေစီအရေး၊ ဖယ်ဒရယ် အရေးဟုဆိုကာ ရွေးကောက်ပွဲကို လက်မခံဟု ပြောနေ ကြသူများလည်း ဖြစ်ကြ၏။ ထိုကဲ့သို့ ရှေ့နောက်မညီ ပြောနေသောသူများ၏စကား၊ ကတိ မတည်သူများ၏ စကား၊ ဉာဏ်တိမ်သူများသာ ယုံကြည်ကြ၏။ ထိုအထဲတွင် NUG နှင့် နောက်လိုက်များ အပါအဝင် KNU က ခေါင်းဆောင်အချို့တို့သည် ရွေးကောက်ပွဲ  ဖြစ်မည်ကို အတင်းကာရော ဖျက်ဆီးမည်ဟု အတိအလင်း ပြောကုန်ကြသည်။
    မကြာသေးမီ ရက်ပိုင်းက ရွေးကောက်ပွဲနှင့်ပတ်သက်၍ ဖျက်ဆီးမည့်သူများအတွက် ဥပဒေများ ထုတ်ပြန်လိုက်ပြီ ဖြစ်သည်။ လတ်တလောတွင်လည်း ဖျက်ဆီးရန် အားထုတ်နေသူများကို အများပြည်သူ ကိုယ်တိုင် တွေ့မြင်နေကြပြီ ဖြစ်သည်။ ထိုကဲ့သို့သူများ၏ အမည်စာရင်းနှင့်တကွ ရွေးကောက်ပွဲကို နှောင့်ယှက်ဟန့်တားဖျက်ဆီးလျှင် ခံရမည့်ပြစ်ဒဏ်များကို အတိအလင်း ကြေညာထားသင့်သည်ဟု ယူဆမိပါသည်။ အဘယ်ကြောင့်ဆိုသော် ရွေးကောက်ပွဲက တစ်ဦးချင်း၊ တစ်ယောက်ချင်း၊ အဖွဲ့အစည်း တစ်ခုအတွက် ပြုလုပ် ခြင်း မဟုတ်ဘဲ တိုင်း၊ နိုင်ငံ၊ ပြည်သူများအတွက် ပြုလုပ်ခြင်း ဖြစ်ကြောင်းကို သိရှိစေရန် ဖြစ်သည်။ ထို့အပြင် ဤတိုင်းပြည်အပေါ် စေတနာထား၍ လုပ်ကိုင်သူနှင့် အဖျက်အမှောင့် လုပ်လိုသူ ကွဲကွဲပြားပြား သိစေလိုသည့် သဘောကြောင့် ဖြစ်ပါသည်။
(ရွှေထီး)  

(TREND News ဂျာနယ်အတွဲ(၄)၊ အမှတ်( ၃၂ ) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )