၂၀၂၅ ၊ ဩဂုတ် ၂၉
မြန်မာပြည်မှာ ဖေ့စ်ဘုတ်သုံးရသည်က အရူးလင်လုပ်ရ ဆိုသလိုမျိုးပင် ဖြစ်သည်။ 'ပွဲဟေ့' ဆိုတာနဲ့ ရှေ့ဆုံးက ဦးအောင်သွားကြည့်ထားမှ တော်ကာကြသည်။ ဒါတောင် ဖေ့စ်ဘုတ်သုံးတဲ့ အတွေ့ အကြုံရင့် ကျက်မှ ပြဿနာတစ်ရပ်၏ အရင်းအမြစ်ကို စေ့စေ့ငုငု သိပြီး ဒီအကြောင်းအရာကို ကိုယ့်အ ကောင့်မှာ ဆရာ ကြီးလုပ်ပြီး ခပ်တည်တည် ပြန်ရေးပြလို့ရသည်။ 'ပွဲ' မမီလိုက်ရင်တော့ ငယ်ငယ်က နေမကောင်းလို့ ကျောင်းပျက်ရပြီး ကျောင်းပြန်တက်ရချိန်တွင် စာလိုက်မမီသလို အူကြောင်ကြောင် ဖြစ်တတ်သည်။ ဒီတော့ မောင်ထူးမြတ်လေး တစ်ယောက်ကတော့ 'ပွဲဟေ့'ဆိုတာနဲ့ လင့်တွေရှာ အကြောင်းအရာတွေ စုံစမ်းပြီး ဖျာခင်းထိုင် ကြည့်တတ်တာက အကျင့်ဖြစ်နေပြီဖြစ်သည်။ ဒါမှလည်း ခေတ်မီသော ဖေ့စ်ဘုတ်သုံးစွဲသူ တစ်ယောက်အဖြစ် အထင်ကြီးခံရမည်ဖြစ်သည်။ အကြောင်းအရာ အပေါ်အခြေခံကာ မိမိကိုယ်ပိုင်စာမျက်နှာမှာ အာချောင်၍ ခပ်တည်တည် တက်ရေးလို့ရမည် ဖြစ်သည်။
ဒီရက်ပိုင်းအတွင်းမှာတော့ မီဒီယာက ငတိတစ်ယောက် အဆဲခံလိုက်ရသည် ဟူသော သတင်းက လည်း ထိပ်တန်းသတင်းဖြစ်နေသည်။ အဆိုတော် သရုပ်ဆောင်လူငယ်တစ်ဦးကို 'နိုင်ရဲ့လား'ဟု သွားမေး လိုက်တာကြောင့် ဟိုက 'ဟကောင် မင်း အဲဒီစကားက မိုက်ရိုင်းတာနော်'ဟု အစချီကာ အဆဲခံလိုက်ရ လေသည်။ မောင်ထူးမြတ်လေးကလည်း မီဒီယာနယ်ပယ်မှာ စာတို ပေစလေးရေးပြီး ကျင်လည်တာဆို တော့ ကိုယ့်နယ်ပယ် ကလူတွေ အဆဲခံရတာဆိုတော့ နည်းနည်းတော့ တင်းမိသည်။ ဒီတော့ 'ပွဲဟေ့' ဆိုတာနဲ့ ထိပ်ဆုံးက သွားကြည့်ထားတော့ ခုလိုဆရာကြီးလုပ်ပြီး ရေးပြနိုင်တာဖြစ်သည်။ မီဒီယာငတိ လေးမေးတာက ဖိုက်ပလက်ဝမ်းဆိုသည့် ရုပ်ရှင်ဇာတ်ကား ကာရိုက်တာအရ မင်းသမီး ငါးယောက် လုံးကို နိုင်ရဲ့လားဟု ရိုးရိုးသားသားသော်လည်းကောင်း၊ ဆန်းဆန်းပြားပြားသော်လည်းကောင်း မေးလိုက်ခြင်း ဖြစ်သည်။ ဒီမှာတင် လူငယ်အဆိုတော် သရုပ်ဆောင်လေး ဘယ်လိုပေါက်ကွဲသွားသည်မသိ ထçကလော် တုတ် လိုက်လေတော့သည်။ မီဒီယာငတိလေးကိုတော့ လေးစားမိသည်။ 'ငါတို့ နိုင်တော့မှာ၊ မပြီးသေး ဘူး...ငါတို့အလှည့် ကျန်သေးတယ်'လို့ ကြွေးကြော်နေသူတွေ သတင်းစားရှင်းလင်းပွဲလုပ်ရင် ထိုမီဒီယာ ငတိလေးကို သွားမေးစေချင်သည်။ 'နိုင်ရဲ့လား'ဟု သွားမေးလို့ အုပ်စုလိုက်ကြီး ဝိုင်းဆဲကြမှာ မြင်ယောင် သေးသည်။
ဒါတင်မကသေး ခုတလော ဖေ့စ်ဘုတ်ကြည့် ရတာကလည်း ပဟေဠိအဖြေ ညှိရသလိုပင်ဖြစ် သည်။ အကယ်ဒမီဆုရ အဆိုတော်မင်းသားကလည်း ဖေ့စ်ဘုတ်ပေါ်တက်ပြီး သူလျှောက်ခဲ့တဲ့လမ်း ကြောင်းကို ပြန်ရစ်ကြည့်ခိုင်းပြန်သည်။ ပခုံးချင်းယှဉ်ချင်ရင် မှန်ကြည့်ခိုင်းပြန်သည်။ တစ်ယောက် ယောက်ကို စောင်းမြောင်းရေးတာကြောင့် မြန်မာတို့၏ ထုံးစံအတိုင်း မြန်မာလိုကြီး သိချင်လှသည်။ မင်းသားရဲ့ စာအဆုံးမှာတော့ ဟိုလူ့ကိုမပြောပါဘူး၊ ဒီလူ့ကိုလည်းမပြောပါဘူး၊ ဟိုညီလေးကို လည်း မပြောပါဘူး၊ ဒီအစ်ကိုကြီးကိုလည်း မပြောပါဘူး ဆိုတာကြောင့် ဖေ့စ်ဘုတ် စပ်စုစိန်တွေ တိုင်ပတ်ကုန်ကြ သည်။ ဖေ့စ်ဘုတ်လောကသားတွေတင်မက အနုပညာရှင် အချင်းချင်းတောင် သူ့ပြောနိုးနိုး၊ ကိုယ့်ပြောနိုး နိုးဖြစ် ကုန်ကြသည်။ ဒီတော့ တစ်နိုင်ငံလုံးကလူတွေ စောင်းပြောသလိုလို ခံလိုက်ရပြန်သည်။ ဒါကလည်း မြန်မာ့ဖေ့စ်ဘုတ်လောက၏ ဖြစ်လေ့ဖြစ်ထရှိသော ဖြစ်စဉ်ပင်ဖြစ်သည်။ ပရိသတ်တွေကတော့ အီလည် လည်ကြီး ဖြစ်ကုန်ကြသည်။ ဒီကိစ္စကိုတော့ မိုက်ထိုးမီဒီယာ ဆရာ၊ ဆရာမကြီးများကို တာဝန်ပေးရ တော့မည်။ အင်တာဗျူးလေး မကြုံကြုံအောင်မေးပြီး ဘယ်သူ့ကို ပြောချင်တာလဲဆိုပြီး တည့်မေးကာ ပွဲမဖြစ်ဖြစ်အောင် လုပ်ပေးရမည်။ ဒါမှလည်း မီဒီယာပီသပေလိမ့်မည်။
ဒီကြားထဲ ဟိုလက်နက်ကိုင်ဆရာကြီး ဂွမ်ဂွမ်က ဖေ့စ်ဘုတ်ပေါ်မှာ ကာတွန်းကား တစ်ကားတင် လိုက်ရာ ဖေ့စ်ဘုတ်သုံးစွဲသူတွေ အဓိပ္ပာယ်အမျိုးမျိုးမှတ်ချက် ပေးကြပြန်သည်။ Mufasa: The Lion King အမည် ရ ကာတွန်းကား၏ ဇာတ်ဝင်ခန်းတစ်ခန်းဖြစ်သော အကောင်ပလောင်တွေ အချင်းချင်း တိုက်ကြခိုက်ကြ ဖို့ အကောင်တစ်ကောင်က မြှောက်ပေးသည့် ဇာတ်ဝင်ခန်း ဖြစ်သည်။ မူဆာဖာအမည်ရ ခြင်္သေ့က ကျန်တဲ့ တိရစ္ဆာန်တွေကို "မင်းတို့ ကြောက်နေကြတာ သိတယ်။ ဒါပေမဲ့ ငါတို့တကွဲ တပြားစီဖြစ်နေရင် ဘာမှ ပြောင်းလဲသွားမှာ မဟုတ်ဘူး။ ငါတို့မျိုးနွယ်တွေနဲ့ တခြားမျိုးနွယ်တွေ အားလုံးအတွက်ရောပဲ။ ဒီနေ့ ငါ့ဆီကို လာတိုက်ခိုက်တာမှန်တယ်။ ဒါပေမဲ့ မင်းတို့ အသိုက်အဝန်းထဲကို သူတို့ကို ဝင်ခွင့်ပေးလိုက်တာနဲ့ မနက်ဖြန်ဆိုရင် မင်းတို့ဘက်ကို မြားဦးလှည့်လာလိမ့်မယ်။ ငါရဲ့တိုက်ပွဲကလည်း မင်းတို့ရဲ့တိုက်ပွဲပဲ။ ငါမကောင်းဆိုးဝါးတွေကို ဒူးမထောက်သလို မင်းတို့လည်း မထောက်သင့်ဘူး။ အတူတူဆိုရင် ငါတို့ သန်မာတယ်"ဆိုပြီး တိရစ္ဆာန်အချင်းချင်း ဆော်ပလော်တီးကြဖို့ မြှောက်ပေးသည့် ကာတွန်းကား ဖြစ်သည်။
မိနစ်ပိုင်းလေးသာရှိသော ကာတွန်းကားလေး တစ်ကားကို ဂွမ်ဂွမ်တင်လိုက်သည်နှင့် တချို့မီဒီ ယာတွေက မနေနိုင်မထိုင်နိုင် သတင်းတွေ ရေးကုန်ကြသည်။ ဒါက ညီညွတ်ကြဖို့ ဂွမ်ဂွမ်ကပြောတာ ဟုဆိုကာ သတင်းအရှည်ကြီးတွေ ရေးကြလေသည်။ တချို့နိုင်ငံရေး၊ စစ်ရေး ပရောဟိတ်ကြီးတွေက လည်း ဒါက ဘာကိုမက် ဆေ့ချ်ပေးချင်တာဟု ဆိုကြပြန်သည်။ ဒီလိုဆိုတော့ပွဲကြိုက်ခင် မောင်ထူးမြတ် လေးလည်း အပြေးအလွှားသွား ကြည့်ရသည်။ ခြင်္သေ့လေးမူဆာဖာ မြှောက်ပေးတာကို ထောက်ခံပြီး မျောက်တွေ၊ ဆင်တွေ၊ ကျွဲတွေ၊ နွားတွေ ကမူးရှူးထိုး ပြေးဝင်ကြသည့် ဇာတ်ဝင်ခန်းဖြစ်ပြီး ဘာမှ မထူးခြားချေ။ အဖြေကတော့ "မင်းတို့ တိရစ္ဆာန်တွေ ညီညွတ်ကြ"ဟုသာ တွေ့ရသည်။ မောင်ထူးမြတ် လေးတို့က လူဖြစ်တာကြောင့် တိရစ္ဆာန်ကိစ္စ စိတ်မဝင်စားချေ။စိတ်ဝင်စားသူတွေကတော့ အမျိုးမျိုး သုံးသပ်ကြစေလိုသည်။ ထူးမြတ်ကတော့ အကြံတစ်ခုပေးလိုသည်။ဖေ့စ်ဘုတ်သုံးတတ်သော လူကြီးသူမတွေ မိမိမြေးမြစ်တွေကို ဖုန်းပေးမကိုင်ကြဖို့လိုသည်။ လက်လွတ်စပယ် ဖုန်းပေးထားရင် သူတို့ကြိုက်သည့် ကာတွန်းကားတွေကို အဘိုးအဘွား အကောင့်တွေမှာ တင်သွားတတ်ကြသည်။ တော်တော် လက်ကလိတတ်တဲ့ ကလေးတွေဖြစ်သည်။
နောက်ပွဲတစ်ပွဲက မည်သို့သော သတင်းအရင်းအမြစ်ကနေ ထွက်သည်မသိ ဖေ့စ်ဘုတ်ပေါ်က တော် လှန်ရေးခေါင်းဆောင်ကြီးတွေရဲ့ ပို့စ်တွေအောက်မှာ လိုက်မန့်ဖို့ အစိုးရက လူစုထားပြီး တစ် ယောက်ကို ၆၈၀၀ ရသည်ဟု ဆိုကြပြန်သည်။ တော်လှန်ရေးဘက် တော်သားကြီးတွေကလည်း ၆၈၀၀ စားတွေကို ရှာဖွေပြီး ဘလော့ဖို့ အချင်းချင်း တိုက်တွန်းကြပြန်သည်။ ဒီတော့ နီးစပ်ရာ ဖေ့စ်ဘုတ်သုံး စွဲသူတွေ၊ မိတ်ဆွေတွေကို မေးရပြန်သည်။ တစ်ရက် ၆၈၀၀ ဆိုတာကလည်း နည်းတဲ့ ဝင်ငွေမဟုတ်ချေ။ ရက် ၃၀ ဆိုရင် နှစ်သိန်းကျော်လောက် ဝင်ငွေရသည်။ ဟိုအန်တီကြီးပြောသလို ဖေ့စ်ဘုတ်ပေါ်မှာ တောက်တာက် တောက်တောက်လုပ်ရုံဖြင့် တစ်လဝင်ငွေ သိန်းချီရတာ နည်းတယ်ဟု မထင်ပေ။ ဒါကြောင့် ထူးမြတ်ကိုလည်း ထိုအလုပ်လေးရှိရင် ချိတ်ဆက်ပေးစေ လိုသည်။ ထူးမြတ်က ဖေ့စ်ဘုတ်ပေါ် မှာ ပွဲလည်းရှာတတ်သလို ပွဲဖြစ်အောင်လည်း မြှောက်ပေးတတ်သည်။ပွဲကြိုက်ခင်ထူးမြတ်တစ်ယောက် ဖေ့စ်ဘုတ်ပေါ်ကနေ ဝင်ငွေရှာတော့မည် ဖြစ်သည်။
(ထူးမြတ်)
(TREND News) ဂျာနယ်အတွဲ (၄) ၊ အမှတ် (၃၂ ) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )
