၂၀၂၅ ၊ ဇူလိုင် ၂၆
ကျေးဇူးတော်ရှင် မဟာဗောဓိမြိုင်ဆရာတော် ဘုရားကြီး ရေးဖွဲ့သီကုံးတော်မူတဲ့ 'ကဗျာ့ဗိမာန်' ကဗျာစာအုပ်ကြီးကို ၂၀၂၅ ဇွန်မှာ ဆုလဲ့နန္ဒာစာပေက ပထမအကြိမ် ပုံနှိပ်ထုတ်ဝေခဲ့ပါတယ်။ ကဗျာအပုဒ်ပေါင်း သုံးရာကျော်ပါဝင်ပြီး ကဗျာအများစုဟာ အမျိုးသားရေးခံစားမှုနဲ့ ရေးဖွဲ့ထားတဲ့ ကဗျာတွေ ဖြစ်ပါတယ်။ ဆရာတော်ကြီးရဲ့ အာရုံမှာ အရိပ်ထင်လာတဲ့ ခေတ်ရဲ့ရုပ်ပုံကားချပ်များကို ပီပီပြင်ပြင် မြင်တွေ့ရမှာ ဖြစ်ပါတယ်။ စာအုပ်အဖွင့်မှာ 'ခေတ်ရေစီးကြောင်း ပဲ့ထောင်မောင်း မစောင်း မနစ်သင့်' ဆိုတဲ့ခေါင်းစဉ်နဲ့ ခေတ်ရဲ့ပုံရိပ်ကို ပြဆိုထားပါတယ်။
'ယနေ့ခေတ် လူသားတို့သည် တစိမ့်စိမ့်တွေး တရေးရေး ခံစားရသည့် ပီတိ၏ အဆိပ်အအိမ့်မျိုးကို ခံစားလိုစိတ်မရှိကြ၊ ချက်ချင်းတွေ့ဝယ် ချက်ချင်းပေး၊ ချက်ချင်းပြေးမျှကိုသာ ခံစားလိုကြရာ ကဗျာ့ဂန္ထဝင် စာဆိုပညာရှင်ဖြစ်ရေးထက် မိမိကဗျာ အများလက်ခံရေးသို့ အပြေးဝင်နေကြရပြီ။ ယနေ့သည် တည့်တိုးအရှိ တုံးတိဝင်လာမှ ကျေနပ်သော ခေတ်တည်း၊ ယနေ့သည် စိတ်အရသာ ဦးစားမပေး၊ သွေးအပြေး ဖမ်းဆီးပေးရေး ခေတ်တည်း။ ခေတ်အသွင်ကဗျာ အစီအရင်ဖြင့် ပြုပြင်မည့်အစား ကဗျာရှင်ကို ခေတ်အသွင်အပြင်ဖြင့် ဗလာငင်ငင်နေပြီဆိုက မမှားပြီ။'
ဒီကဗျာတွေကို ပုံတောင်စခန်း၊ ကျော်တော ကျေးရွာ၊ စံရိပ်ငြိမ်တောရကျောင်းကလေးမှာ လွန်ခဲ့တဲ့ နှစ်ပေါင်း ၂၀ ကျော် ၁၃၆၄ ခုနှစ်ဝန်းကျင်က ရေးခဲ့တာ ဖြစ်ကြောင်း သိရပါတယ်။ ကျေးဇူးတော်ရှင် မဟာဗောဓိမြိုင်ဆရာတော်ဘုရားကြီးရဲ့ အမျိုးသားရေးအမြင် ကဗျာများထဲက ခံစားဖွယ် စံထားဖွယ် ကဗျာအချို့ကို ရွေးကောက်တင်ပြချင်ပါတယ်။
'ကြေးစားမ'
- ဘဝကို အရေးမထား
ကြေးစားအဖြစ် လူပေါင်နှံကာ
ပေါင် ဒေါ်လာ ကြော်ငြာကြေးရ
ဖော်ကာပေးရ သွေးကျအစာ၊
- သူ့အကြိုက်ကျ လိုက်ရရှာ
အလိုက်ရလာသည်က ဆုကြေးများ၊
- တိုင်းပြည်ရဲ့ သိက္ခာ
ဆိုင်းချည်ဖွဲ့ ပိတ် မကာသည့်အပြင်
အဘိဇ္ဈာ ဣဿာ ဆူဗလောင်တွေနဲ့
လူလယ်ကောင် အညှီပေါင်
ဗြောင်လှန်ပြသည့်နှယ်
ကြောင်သံ လှောင်သံ အပေါင်ခံအထားတွေကဖြင့်
လေကြားမှာကွဲ့ အပြေးအလွှား
အိုကွယ် ...
အခြေအသားမပါတဲ့
ကြေးစားသမတို့ရဲ့ ဘေးစကား။ ။ (စာ-၂၀၁)
ပေါင်၊ ဒေါ်လာကို ကြော်ငြာကြေးရလာပြီဆိုမှတော့ တိုင်းပြည်ရဲ့ ဂုဏ်သိက္ခာကို မကာကွယ်နိုင်တော့တဲ့အပြင် သမိုင်းအစဉ်အလာနဲ့ ဇာတိမာန်ကိုပါ ချိုးနှိမ်ဖျက်ဆီးခဲ့တဲ့ ခေတ်ပြိုင်ပုံရိပ်များကို ထင်ဟပ် ပြခဲ့ပါတယ်။ အနောက်တိုင်းက စေခိုင်းသူ ဒေါ်လာရှင်ကြီးများအကြိုက် တိုင်းပြည်နှင့်လူမျိုးကို ဖျက်ဆီးနိုင်လေလေ ဆုကြေးငွေ များများရလေလေဆိုတာ ထင်သာမြင်သာ ရှိလှပါတယ်။
'အမေအို'
- အမေအိုအို ရွှေကိုယ်အမောက်ပြ
ပျိုဆံတောက်က ရှုံးရမလို
ဓန ရွှေငွေ ဝေနိုင်မျှသမို့
အမေကိုင်သမျှ ဝိုင်းရံဖြို၊
အမေရဲ့အလို
ခိုနေသူတွေ ကြိုးကြားဆိုကြ၊
- သူ့ခေါင်းက ဆံပင်ဖြူ
အမှုပေါင်းကလည် နာလန်ပင် မထူနိုင်ဘူး
တစ်ကံဝင် တစ်ပြန်ငင် အရေတွန့်လို့ရယ်
အမေကွန့်ပုံကဖြင့် ပုံမကျပန်းမကျ
အိုကွယ် ...အသရေဆွဲပုံကလည်း
ဂုဏ်နှင့်ပင် မမျှတ။ ။ (စာ-၁၉၈)
ဂုဏ်နှင့်ပုံရိပ် မချိတ်မိတဲ့ အမေအိုတစ်ယောက်ရဲ့ ရုပ်ပုံလွှာကို ရေးဖွဲ့ရာမှာ ကာရန်တွေက အသက်ဝင်နေလွန်းလှပါတယ်။ ဒီအမေအိုကိုပဲ 'သွေးလိုက် မမှန်သော အမေအို' ခေါင်းစဉ်နဲ့ ဆက်လက် ရေးဖွဲ့ထားပါတယ်။ ကြေးစားမ၊ ဂုဏ်ဖျက်မ စတဲ့ ကဗျာများဟာလည်း အမေအိုရဲ့ ကိုယ်ခွဲများလို့ ဆိုနိုင်ပါတယ်။ 'အမေအိုအို မလိုသော်တိုက်ခိုက် လိုလျှင်တော့ သိမ်းပိုက်ပြန်သည်'လို့ အစချီထားပြီး 'အဖြူအမည်းရဲ့ နှစ်မျက်နှာ ချူပွဲ ဆူပွဲနဲ့ ထွက်လာသမို့'ဆိုတဲ့ ရေးဖွဲ့ပုံမျိုးက စေ့စေ့တွေး ရေးရေးပေါ် စေခဲ့ပါတယ်။
'လေထု ညစ်ညမ်းလာခြင်း'ဆိုတဲ့ ကဗျာမှာတော့ BBC, VOA , RFA စတဲ့ သတင်းဌာနများရဲ့ အပုပ်နံ့တွေကို အတိအလင်း ဖော်ထုတ်ထားပါတယ်။ ပြည်ပအခြေစိုက် သတင်းဌာနကြီးများက မွေးထားတဲ့ သတင်းထောက်တွေဆိုတာ ...'သူလိုက်သည်က သတင်းဆိုး၊ ဆိုးကျိုးသက်သက်မျှ၊ တော်၏၊ ကောင်း၏၊ သင့်၏ အခင်းထိုသတင်း အလျင်းသူမပို့'လို့ မီးမောင်းထိုးပြထားပါတယ်။ မည်သည့်တိုင်း ပြည်မဆို အကောင်းအဆိုး ဒွန်တွဲနေရာ မြန်မာနိုင်ငံနဲ့ ပတ်သက်လာရင် အကောင်းတွေကို မျက်ကွယ် ပြုပြီး အဆိုးလို့ ထင်စရာရှိတာတွေကိုသာ ...
'သွားပုပ်လေချီ အော်တမ်းမြည်သော
ဘီဘီစီ၊ ဗွီအိုအေ၊ အာရ်အက်ဖ်အေ စက်
ပို့လွှင့်ချက်မှာ၊ တစ်ကွက်အမှောက်
တစ်ယောက်အမှား၊ ယောက်အများ၊ နားမှမခံသာ" လို့ ညွှန်ပြထားပါတယ်။
အဲဒီ ပြည်ပသတင်းဌာနကြီးတွေဟာ 'သိက္ခာမဲ့မဲ့ ဖဲ့ရွဲ့ကုံးသီ၊ ဖုံးမဆည်း လုံးတီးပြရှာ သူတို့မှာ'လို့ ဆိုထားပါတယ်။ ဒါ့ကြောင့် ဒင်းတို့ကို 'မပီရှေ့ရေး၊ ပြည်ပြေးတိုင်းခြား၊ အို ...ဂိုဏ်းသားတို့'လို့ ခေါ်ဆိုလိုက်ပြီး 'တိုင်းကားပြည်ရွာ၊ ကိုယ့်နေရာ၏၊ ကိုယ့်မှာ လူမျိုး၊ ဂုဏ် မညှိုးအောင်၊ မျိုးမျိုးပုတ်ခတ်၊ ထိုလုပ်ဇာတ်၊ ရပ်တန်းကပင် ရပ်ကြကုန်'လို့ သတိပေးရေးဖွဲ့ထားပါတယ်။ (စာ- ၁၉၇၊ ရှု)
'လေထုညစ်ညမ်းလာခြင်း' ကဗျာနဲ့ယှဉ်တွဲ ဖတ်ရှုသင့်တဲ့ ကဗျာကတော့ 'ပါးစပ်ပေါင်' ကဗျာဖြစ် ပါတယ်။ ကွယ်ဝှက်အနက်မပါ၊ ဖုံးကွယ်ထားတာမရှိ၊ ခေတ်ရဲ့ သားကောင်များကိုကြည့်ကာ တည့်တည့် ကြီးရေးထားတဲ့ ကဗျာဖြစ်ပါတယ်။
'ပါးစပ်ပေါင်'
- ကိုယ်၏ ပြည်တွင်း မမှီတင်းဘဲ
ပြည်ရင်းကိုပစ်၊ ပြည်သစ်မှာ ခို
သူ့အလိုကျ ဆိုပေးရ
ဟိုက သည်က အတင်းဖျင်း။
- သူ့သဘောကျ ပြောပေးရ
လောကသဘာ၀ အခင်းကျင်း။
- အတင်းအဖျင်း၊ ခင်းကျင်းသုံးနှုန်း
စကားလုံးက၊ တိုက်လုံးခိုက်လုံး
ဖွဲ့ထုံးပြောင်မြောက်၊ ဆန်းသစ်တောက်သော်
လုံးကောက်ရေကျ အချိန်မျှ
ဆုက ရသည်ကိုး။
- သူ့အလိုလည်းကျ၊ ဆုကိုလည်းရ၊ ထိုနှစ်ဝကြောင့်
ဟိုက တိုင်းပြည်၊ ဟိုကိုင်းမှီကာ
တို့ပြည်တို့ကျိုး၊ တို့လူမျိုးဇာတ်
ဆိုးကပ်သပ်ကို၊ ပါးစပ်အပေါင်ထား
ကပ်မြှောင်ဖား၊ ပေါင်ကြားရောင်းလူစား။ ။
(စာ-၂၄၆)
ကျေးဇူးတော်ရှင် မဟာဗောဓိမြိုင်ဆရာတော် ဘုရားကြီးက အမျိုးသားရေးစိတ်ဓာတ် အထူးလိုအပ်နေပုံကို ဖော်ညွှန်းထားတဲ့ ကဗျာတဒ်ပုဒ်မှာ 'ငါသည် စစ်သား'ဆိုတဲ့ တင်စားချက်ကို တွေ့ရမှာ ဖြစ်ပါတယ်။
'ငါ့အဓိဋ္ဌာန်'
- ငါသည် မြန်မာ၊ ငါသည် စစ်သား
ငါသည် မြန်မာပြည်ဖွား ...။
- သည်စကားသံ၊ ဧကန်မှန်လျှင်
ဝေယံပြေးလွှား၊ ရန်သူများပင်
ငါ့ဖဝါးအောက်၊ ဧကန်ရောက်
ဒူးထောက် ညံ့ခံစေ။
- ရေကြောင်းမှသော်၊ ရန်သူပေါ်လည်း
ပေါ်ရာမှာမြှုပ် ရေတွင်ပုပ်
မြေမြှုပ်ပြီးသား ဖြစ်သွားစေ။
- ကုန်းကြောင်းမှတက်၊ ထိုရန်ဘက်လည်း
လက်နက်နဲ့လူ စက်အကူ
အတူင့ါလက် ရောက်လာစေ။
- တစ်ပြည်မှနေ၊ ငါ၏ပြည်သို့
စေလွှတ်ကစား၊ လက်နက်များလည်း
ထက်ဖျားမြန်ပြည်၊ မရောက်မီပင်
တုံ့ချီပြန်နှက် ငါ့လက်နက်ကြောင့်
တစ်ပျက်စီကျ၊ တစ်စစီေ<က
ငါ့မြေ မရောက် ရှိခဲ့စေ။
- ငါသည် မြန်မာ ငါသည်စစ်သား
ငါသည် မြန်မာပြည်ဖွား တိုင်းရင်းသား
ဤစကားသံ ဧကန်မှန်
ပြည်မြန် ရေဘေးအေးစေသော်။ ။ (စာ-၁၇၄)
ဆရာတော်ကြီးရဲ့ ဇာတိသွေးနဲ့ရေးတဲ့ ဇာတိမာန်ကဗျာလို့ ဆိုနိုင်ပါတယ်။ 'မြန်မာဖတ်စာ' ဆိုတဲ့ကဗျာကတော့ နိုင်ငံခေါင်းဆောင်များနှင့် နိုင်ငံသားများ နှုတ်တက်ရွရွ ရွတ်ဆိုသင့်ကြတဲ့ ကဗျာ တစ်ပုဒ်ဖြစ်ပါတယ်။
'မြန်မာဖတ်စာ'
'သင့်လက်ထက်မှာ၊ မြန်မာ့လက်ရိုး၊ တိုးထက်တိုးဖို့၊
တန်ခိုးအာဏာ၊ ရှိထိုက်စွာ၊ နေရာဦးတတ်စေ။'
'အာဏာတန်ခိုး၊ သင်ကြီးစိုးဖို့၊ အားကိုးပါကံ၊ ကြံစမ်း
ပါ့စိတ်၊ ကြိတ်စမ်းပါ့ဇွဲ၊ လုံးခဲခဲ၊ လက်ထဲတင်းလင်း ရှိ
ပါစေ။'
'ကံကလည်းထန်၊ အကြံကလည်းပြင်း၊ ဇွဲလည်းတင်း
သော်၊ ကိုယ်ချင်းလည်းပြိုင် သူချင်းပြိုင်၊ အနိုင်ကျင့်
ပါလေ ...။'
'စီးပွားချင်းပြိုင် ငွေချင်းပြိုင်၊ အနိုင်သင့်လက်ရှိပါစေ။'
'ဘာသာချင်းပြိုင်၊ သိက္ခာချင်းပြိုင်၊ အနိုင်သင့်လက်
ရှိပါစေ။'
'ကံပြိုင်စိတ်ပြိုင် ဇွဲချင်းပြိုင်မှ၊ ကြံ့ခိုင်စွမ်းအား လွန်
ဖွံ့ထွားသော်၊ စီးပွားရေးရာ အချက်ချာ၊ သင်သာ
အာဏာရှိ။'
'အမျိုးသားရေးရာ အကွက်မှာ သင်သာပါဝါပြည့်။'
'ဘာသာရေးရာ မျက်နှာစာ သင်သာ သိက္ခာရှိ။'
(စာ-၂၃၂)
ကျေးဇူးတော်ရှင် မဟာဗောဓိမြိုင်ဆရာတော် ဘုရားကြီးဟာ အရိယာသူတော်ကောင်းကြီး ဖြစ်ပါလျက် ဒီလိုမာန်တက်တဲ့ ကဗျာတွေ ဘာ့ကြောင့်ရေးရသလဲလို့ မေးခွန်းထုတ်နိုင်ပါတယ်။ ဆရာတော်ဘုရားကြီးဟာ မိမိ ကိုယ်မှခွာ၍ 'ငါသည်မြန်မာ'ဆိုတဲ့ အမျိုးသားရေးကိုယ်စားပြု နိမိတ်ပုံဖြင့် ရေးဖွဲ့ခဲ့တာ ဖြစ်တယ်လို့ အဖြေပေး ချင်ပါတယ်။ ကမ္ဘာလောကမှာ 'ဇာတိပုည ဂုဏ်မာန'ဆိုတာ ထာဝရ ရှင်သန်နေသင့်တယ် မဟုတ်ပါလား။
(မောင်သွေးချွန်)
(TREND News ဂျာနယ်အတွဲ(၄)၊ အမှတ်( ၂၇ ) တွင်ပါရှိသော ဆောင်းပါးအား တဆင့်ပြန်လည်မျှဝေခြင်းဖြစ်ပါသည်။ )
